ਨਜ਼ਮ

ਕੋਈ ਤਾਂ ਖਬਰ ਸੁਣਾਅ ਕਿ ਸੋਚ ਨੂੰ ਵਿਰਾਮ ਆਏ |
ਇੱਕ ਤਾਂ ਝਲਕ ਦਿਖਾ ਕਿ ਦੀਦ ਨੂੰ ਆਰਾਮ ਆਏ |

ਆਣਾ ਜੇ ਨਹੀਂ ਸੁਨੇਹਾ ਭੇਜ ਕਿਸੇ ਬੇਗਾਨੇ ਦੇ ਹੱਥ ,
ਕਿਸੇ ਆਪਣੇ ਹੱਥ ਫਿਰ ਮੈਖਾਨੇ ਦਾ ਪੈਗਾਮ ਆਏ |

ਕੋਈ ਤਾਂ ਜਖ਼ਮ ਦੇ ਕਿ ਦਿਲ ਨੂੰ ਟਕੋਰ ਕਰ ਸਕਾਂ ,
ਬੇਵਫ਼ਾਈ ਦਾ ਸਿਰ ਮੇਰੇ ਕੋਈ ਤਾਂ ਇਲਜ਼ਾਮ ਆਏ |

ਖਾਸ ਤਾਂ ਸੀ ਉਸਦੀ ਨਜ਼ਰ ਕਿ ਨਜ਼ਰ ਥਮ ਗਈ ,
ਵਰਨਾ ਮਹਿਫ਼ਲ 'ਚ ਬਹੁਤ ਖਾਸ-ਓ-ਆਮ ਆਏ |

ਸਮੇਟ ਲੈ ਹੁਣ ਯਾਦਾਂ ਦੇ ਟੁੱਟੇ ਕੱਚ ਦੀ ਨੁਮਾਇਸ਼ ,
ਇਸ ਤੋਂ ਪਹਿਲਾਂ ਕਿ ਸਮਝਾਣ ਕੋਈ ਇਮਾਮ ਆਏ |

ਬਹੁਤ ਹੋ ਗਈ 'ਅਮਗੀਤ' ਸ਼ਬਦਾਂ ਦੀ ਉਧੇੜ ਬੁਣ ,
ਜਰੂਰੀ ਤਾਂ ਨਹੀਂ ਕਿ ਹਰ ਰਾਸਤੇ ਦਾ ਮੁਕਾਮ ਆਏ |