ਇੱਕ ਵਾਅਦਾ

ਤੂੰ ਨਾਰਾਜ਼ ਨਾ ਹੋ
ਮੇਰੇ ਨਾਲ਼
ਮੇਰੀ ਜਾਨ
ਵਾਅਦਾ ਕਰਦਾ ਹਾਂ

ਮੈਂ ਖਿਲਾਵਾਂਗਾ ਤੈਨੂੰ
ਦੁਨੀਆਂ ਦੀ ਸਭ ਤੋਂ ਸਸਤੀ ਕਾਰ ਵਿੱਚ ਬੈਠ
ਇਤਿਹਾਸ ਦੀ ਸਭ ਤੋਂ ਮਹਿੰਗੀ
ਦਾਲ਼ ਰੋਟੀ

ਮੈਂ ਘੁਮਾਵਾਂਗਾ ਤੈਨੂੰ
ਝੋਂਪੜੀਆਂ ਦੇ ਮਹਾਂਸਾਗਰਾਂ ਵਿੱਚ ਉਸਰੇ
ਲਾਮਿਸਾਲ ਸੁੰਦਰਤਾ ਨਾਲ਼ ਸਜੇ
ਸੋਨੇ ਦੇ ਮੰਦਿਰ

ਮੈਂ ਦਿਖਾਵਾਂਗਾ ਤੈਨੂੰ
ਨਫ਼ਰਤ ਦੇ ਇਸ ਕਾਲ਼ੇ ਦੌਰ ਵਿੱਚ ਵੀ ਕੋਈ
ਕਰ ਸਕਦਾ ਹੈ ਕਿੰਨੀ ਸ਼ਿੱਦਤ ਨਾਲ਼
ਕਿਸੇ ਨੂੰ ਪਿਆਰ

ਤੇ ਸੁਣਾਵਾਂਗਾ ਤੈਨੂੰ
ਜ਼ਿਹਨੀ ਗੁਲਾਮੀ ਦੀ ਤੂਫ਼ਾਨੀ ਹਨੇਰੀ ਵਿੱਚ
ਆਜ਼ਾਦੀ ਦੇ ਮਤਵਾਲੇ ਹੋਏ
ਮੇਰੇ ਗੀਤ |