(ਗ਼ਮ ਨਹੀਂ ਮੁਝਕੋ ਕਿ ਬਦਲ ਰਹਾ ਹੈ ਜ਼ਮਾਨਾ,
ਮੇਰੀ ਜ਼ਿੰਦਗੀ ਹੈ ਤੁਝਸੇ, ਕਹੀਂ ਤੁਮ ਬਦਲ ਨਾ ਜਾਨਾ..)

ਗ਼ਮ ਨਹੀਂ ਮੈਨੂੰ

ਕਿ ਬਦਲ ਰਿਹਾ ਹੈ ਜ਼ਮਾਨਾ

ਹਾਂ ਲੱਗੀ ਰਹਿੰਦੀ ਏ

ਇੱਕ ਫ਼ਿਕਰ

ਜ਼ਮਾਨਾ ਬਦਲਣ ਲਈ

ਮੈਂ ਵੀ ਕੁਝ ਕਰ ਰਿਹਾ ਹਾਂ ਜਾਂ ਨਹੀਂ

ਤੇ ਫ਼ਿਕਰ ਰਹਿੰਦੀ ਤੇਰੀ ਵੀ

ਕਿ ਤੂੰ ਵੀ ਕੁਝ ਬਦਲਿਆ ਹੈਂ ਜਾਂ ਨਹੀਂ

ਕਿਉਂਕਿ

ਬਦਲਦੇ ਨਹੀਂ ਤਾਂ

ਬੁੱਤ ਜਾਂ ਮੁਰਦਾ ਲੋਕ

[ਜਾਂ ਸ਼ਾਇਦ ਇਹ ਵੀ
ਬਦਲ ਜਾਂਦੇ ਹਨ
ਖ਼ਰ ਜਾਂਦੇ ਹਨ
ਗਲ਼ ਜਾਂਦੇ ਹਨ

ਬਦਬੂ ਮਾਰਨ ਲਗਦੇ ਹਨ]

ਤੇ ਇਹਨਾਂ ਦੋਵਾਂ ਨੂੰ
ਮੈਂ ਕਦੇ ਵੀ ਪਿਆਰ ਨਹੀਂ ਕਰ ਸਕਦਾ....

ਇੱਕ ਵਾਅਦਾ

ਤੂੰ ਨਾਰਾਜ਼ ਨਾ ਹੋ
ਮੇਰੇ ਨਾਲ਼
ਮੇਰੀ ਜਾਨ
ਵਾਅਦਾ ਕਰਦਾ ਹਾਂ

ਮੈਂ ਖਿਲਾਵਾਂਗਾ ਤੈਨੂੰ
ਦੁਨੀਆਂ ਦੀ ਸਭ ਤੋਂ ਸਸਤੀ ਕਾਰ ਵਿੱਚ ਬੈਠ
ਇਤਿਹਾਸ ਦੀ ਸਭ ਤੋਂ ਮਹਿੰਗੀ
ਦਾਲ਼ ਰੋਟੀ

ਮੈਂ ਘੁਮਾਵਾਂਗਾ ਤੈਨੂੰ
ਝੋਂਪੜੀਆਂ ਦੇ ਮਹਾਂਸਾਗਰਾਂ ਵਿੱਚ ਉਸਰੇ
ਲਾਮਿਸਾਲ ਸੁੰਦਰਤਾ ਨਾਲ਼ ਸਜੇ
ਸੋਨੇ ਦੇ ਮੰਦਿਰ

ਮੈਂ ਦਿਖਾਵਾਂਗਾ ਤੈਨੂੰ
ਨਫ਼ਰਤ ਦੇ ਇਸ ਕਾਲ਼ੇ ਦੌਰ ਵਿੱਚ ਵੀ ਕੋਈ
ਕਰ ਸਕਦਾ ਹੈ ਕਿੰਨੀ ਸ਼ਿੱਦਤ ਨਾਲ਼
ਕਿਸੇ ਨੂੰ ਪਿਆਰ

ਤੇ ਸੁਣਾਵਾਂਗਾ ਤੈਨੂੰ
ਜ਼ਿਹਨੀ ਗੁਲਾਮੀ ਦੀ ਤੂਫ਼ਾਨੀ ਹਨੇਰੀ ਵਿੱਚ
ਆਜ਼ਾਦੀ ਦੇ ਮਤਵਾਲੇ ਹੋਏ
ਮੇਰੇ ਗੀਤ |

ਸੂਰਜ ਦੀਆਂ ਅੱਖਾਂ

ਤੂੰ ਅਕਸਰ ਪੁੱਛਦੀ ਏਂ
ਕਿਉਂ ਨਹੀਂ ਸਾਂ ਦੇਖਦਾ
ਮੈਂ ਤੇਰੇ ਵੱਲ
ਕਿਉਂ ਤੱਕਦਾ ਰਹਿੰਦਾ ਸਾਂ ਜ਼ਮੀਨ ਵੱਲ
ਜਦ ਵੀ ਲੰਘਦਾ ਸੀ ਤੇਰੇ ਕੋਲੋਂ ਮੈਂ

ਸੋਚਦਾ ਸੀ
ਕਿਵੇਂ ਕੋਈ ਦੇਖ ਸਕਦੈ
ਸੂਰਜ ਦੀਆਂ ਅੱਖਾਂ ਵਿੱਚ ਅੱਖਾਂ ਪਾਕੇ
ਡਰਦਾ ਸਾਂ
ਚੁੰਧਿਆ ਜਾਣਗੀਆਂ
ਹਨੇਰਾ ਦੇਖਣ ਦੀਆਂ ਆਦੀ
ਹਨੇਰੇ ਚ ਰਹਿੰਦੀਆਂ
ਹਨੇਰੇ ਨਾਲ਼ ਭਰੀਆਂ
ਮੇਰੀਆਂ ਅੱਖਾਂ
ਤੇ ਕਦੇ ਵੀ ਨਹੀਂ ਦੇਖ ਸਕਾਂਗਾ
ਤੇਰੇ ਨੈਣਾਂ ਵਿੱਚ
ਮੇਰੇ ਲਈ ਪਿਆਰ
ਮੈਨੂੰ ਵੇਖ ਆਉਂਦੀ
ਤੇਰੇ ਚੇਹਰੇ ਤੇ ਮੁਸਕਾਨ

ਹੁਣ ਜਦੋਂ
ਲੈ ਲਿਆ ਹੈ ਮੈਨੂੰ
ਤੂੰ ਆਪਣੀਆਂ ਬਾਹਵਾਂ ਚ
ਦੇਖਾਂਗਾ ਮੈਂ ਤੇਰੇ ਵੱਲ
ਇੱਕ ਦਿਨ
ਜੀ ਭਰਕੇ ਤੱਕਾਂਗਾ
ਸੂਰਜ ਦੀਆਂ ਅੱਖਾਂ ਵਿੱਚ
ਨਹੀਂ ਹੈ ਡਰ ਮੈਨੂੰ
ਅੱਖਾਂ ਖੋ ਜਾਣ ਦਾ
ਕਿਉਂਕਿ
ਸੂਰਜ ਦੀਆਂ ਅੱਖਾਂ ਹੀ
ਹੁਣ ਮੇਰੀਆਂ ਅੱਖਾਂ ਹਨ
ਤੇਰੀਆਂ ਅੱਖਾਂ ਹੀ
ਹੁਣ ਮੇਰੀਆਂ ਅੱਖਾਂ ਹਨ......