Wednesday, October 31, 2012


ਅਕਸਰ ਸੁਣਦੇ ਹਾਂ
ਕਿ ਠੰਡਾ ਦੌਰ ਚਲ ਰਿਹਾ ਹੈ
ਸਮਾਂ ਠੰਡਾ ਲੋਕ ਠੰਡੇ ਰਿਸ਼ਤੇ ਠੰਡੇ ਪਿਆਰ ਠੰਡਾ
ਪਰ ਖਿਆਲ ਆਉਂਦਾ ਹੈ
ਠੰਡੇ ਤੇ ਠੰਡੇ 'ਚ ਵੀ ਤਾਂ ਫ਼ਰਕ ਹੁੰਦਾ ਹੈ
ਠੰਡੀ ਰਾਤ ਨੇ ਪਿਘਲਣਾ ਹੁੰਦਾ ਹੈ
ਜੀ ਆਇਆਂ ਕਹਿਣਾ ਹੁੰਦਾ ਹੈ
ਅੱਗ ਦਾ ਗੋਲਾ ਬਣਕੇ ਆਉਣ ਵਾਲੇ ਸੂਰਜ ਨੂੰ
ਠੰਡੇ ਸਮੇਂ 'ਚ ਤਿਆਰੀਆਂ ਹੁੰਦੀਆਂ ਨੇ
ਸ਼ੀਸ਼ੇ  ਬਣਾਏ ਜਾਂਦੇ ਹਨ
ਤੇਜ਼ ਧੁੱਪਾਂ ਨੂੰ ਫੜ ਕੇ ਇੱਕ ਥਾਂ ਇਕੱਠਿਆਂ ਕਰਨ ਲਈ

ਪਰ ਠੰਡੇ ਹੋ ਗਏ ਆਦਮੀ ਨੇ, ਰਿਸ਼ਤੇ ਨੇ, ਪਿਆਰ ਨੇ
ਗਲਣਾ ਹੁੰਦਾ ਹੈ
ਬਦਬੂ ਫੈਲਾਣੀ ਹੁੰਦੀ ਹੈ
ਕਿਸੇ ਸਮੇਂ ਮਿੱਠੇ ਰਹੇ
ਤੇ ਹੁਣ ਫਫੂੰਦ ਲੱਗੇ ਅੰਬ ਵਾਂਗ
ਫਿਰ ਕਿਉਂ ਨਾ ਦੋਸਤੋ
ਅਸੀਂ ਠੰਡੇ ਰਹਿ ਕੇ
ਠੰਡ ਦੇ ਪਿਘਲਣ ਦੀ ਰਫ਼ਤਾਰ ਨੂੰ ਤੇਜ਼ ਕਰੀਏ
ਅਤੇ ਠੰਡੇ ਪੈ ਗਏ
ਰਿਸ਼ਤਿਆਂ ਨੂੰ ਤੇ ਪਿਆਰਾਂ ਨੂੰ
ਹਵਾਲੇ ਕਰੀਏ
ਧਰਤੀ ਦੀ ਨਿੱਘ ਦੇ.....



No comments:

Post a Comment