'ਨਹੀਂ' ਦੀ ਪ੍ਰਸਵ ਪੀੜਾ

ਕੁਝ ਰਾਹੀ ਨੇ 

ਜਿਨ੍ਹਾਂ ਦੇ ਘਰ ਨਹੀਂ ਰਹੇ 

ਕੁਝ ਘਰ ਨੇ 

ਜਿਨ੍ਹਾਂ ਦੇ ਦਰ ਨਹੀਂ ਰਹੇ 

ਕੁਝ ਯਾਦਾਂ ਦੇ ਜੰਗਲ ਨੇ 

ਜੋ ਸੜ ਨਹੀਂ ਰਹੇ 

ਕੁਝ ਦਿਲਚੱਟੇ ਨੇ 

ਜੋ ਮਰ ਨਹੀਂ ਰਹੇ 

ਕੁਝ ਪੰਛੀ ਨੇ 

ਜਿਨ੍ਹਾਂ ਦੇ ਪਰ ਨਹੀਂ ਰਹੇ 

ਕੁਝ ਸੁਪਨੇ ਨੇ 

ਪੈਰਾਂ ਸਿਰ ਖੜ੍ਹ ਨਹੀਂ ਰਹੇ 

ਕੁਝ ਸਿਵੇ ਨੇ 

ਜੋ ਠਰ੍ਹ ਨਹੀਂ ਰਹੇ 

ਕੁਝ ਸਿਲ੍ਹੇ ਮੁੱਢ ਨੇ 

ਜੋ ਅੱਗ ਫੜ ਨਹੀਂ ਰਹੇ 

ਕੁਝ ਜਾਲੇ ਨੇ 

ਜਿਨ੍ਹਾਂ ਦੇ ਮਿਲ ਲੜ ਨਹੀਂ ਰਹੇ 

ਕੁਝ ਹੱਲ ਬੁਝਾਰਤਾਂ ਨੇ 

ਜੋ ਵਕਤ ਪੜ੍ਹ ਨਹੀਂ ਰਹੇ 

ਕੁਝ ਬੇਚੈਨ ਪਲ ਨੇ 

ਜੋ ਖਿਆਲਾਂ 'ਚ ਢਲ ਨਹੀਂ ਰਹੇ 

ਕੁਝ ਤਿਲਕਣੇ ਖਿਆਲ ਨੇ 

ਜੋ ਸ਼ਬਦਾਂ ਨੂੰ ਵਰ ਨਹੀਂ ਰਹੇ 

ਤੇ ਕਵਿਤਾ 

ਇਹਨਾਂ ਤੇ ਹੋਰ ਬਹੁਤ ਸਾਰੇ ਅਦਰਜ "ਨਹੀਂ" ਨਾਲ 

ਬਹਿਸਦੀ 

ਲੜਦੀ 

ਜਨਮਦੀ ਹੈ 

ਕੁਝ "ਨਹੀਂ" ਨੂੰ ਸਤਰਾਂ 'ਚੋਂ ਹਟਾਉਣ ਦੀਆਂ 

ਕੋਸ਼ਿਸ਼ਾਂ ਦੀ ਕੋਸ਼ਿਸ਼ ਬਣ ਜਾਂਦੀ ਹੈ

ਕੁਝ "ਨਹੀਂ" ਨੂੰ 

ਹੋਰ ਗੂੜ੍ਹਾ ਕਰ ਜਾਂਦੀ ਹੈ 

ਜਦੋਂ ਤੱਕ 

ਕੁਝ "ਨਹੀਂ" ਹਨ ਮੇਰੇ ਕੋਲ 

ਉਹ ਮੇਰੇ ਕੋਲ ਆਉਂਦੀ ਰਹੇਗੀ

ਤੇ ਉਹਦੇ ਕੋਲ 

ਮੈਂ ਜਾਂਦਾ ਰਹਾਂਗਾ 

ਕਵਿਤਾ 

ਜਨਮਦੀ ਰਹੇਗੀ.....