ਪਹਿਲਾ ਪਿਆਰ - 1

ਤੇਰੀ ਮੇਰੀ ਸਾਂਝ

ਕੁਝ ਇਸ ਤਰ੍ਹਾਂ ਰਹੀ

ਜਿਵੇਂ

ਟੁੱਟਦੇ ਤਾਰੇ ਤੇ ਧਰਤੀ ਦਾ ਰਿਸ਼ਤਾ

ਖਿੱਚ ਇੰਨੀ ਕਿ

ਤੇਰੇ ਦਿਲ ਨੂੰ ਚੁੰਮਣ ਤੋਂ ਪਹਿਲਾਂ ਹੀ

ਮੈਂ ਰਾਖ਼ ਹੋ ਗਿਆ

ਰੋਸ਼ਨੀ ਦੀ ਲੀਕ

ਇੰਨੀ ਤਿੱਖੀ ਰਹੀ

ਕਿ ਮੇਰੇ ਵਕਤ ਨੂੰ ਅਨੰਤਤਾ ਤੱਕ

ਦੁਧੀਆ ਕਰ ਗਈ
ਤੇ ਸੇਕ ਵੀ ਇੰਨਾ ਕਿ

ਚੁਫੇਰੇ ਖਿਲਰੀ ਰਾਖ਼ 'ਚੋਂ
ਮੈਂ ਜਿਉਂ ਉੱਠਿਆ

ਕੁਕਨੂਸ ਵਾਂਗ...

ਗਜ਼ਲ

ਮੇਰੇ ਸਿਰ 'ਤੇ ਕਰਜ਼ ਬੜੇ ਨੇ |

ਮਿਲਣ 'ਚ ਤੈਨੂੰ ਹਰਜ਼ ਬੜੇ ਨੇ|

ਨਾਮ ਤੇਰਾ ਹੀ ਗਾਉਂਦਾ ਰਹਿਨਾ,

ਦਿਲ ਵਿੱਚ ਉਂਝ ਤਾਂ ਲਫ਼ਜ਼ ਬੜੇ ਨੇ|

ਮੇਰੇ ਹੀ ਕਿਉਂ ਤੇਰੇ ਵੀ ਤਾਂ,

ਰਾਹ ਵਿੱਚ ਸੁਣਿਆ ਫਰਜ਼ ਬੜੇ ਨੇ|

ਤੇਰੇ ਨੇੜੇ ਰਹਿ ਕੇ ਲੱਗਾ,

ਦੁਨੀਆਂ ਦੇ ਵਿੱਚ ਮਰਜ਼ ਬੜੇ ਨੇ|

'ਵਾਵਾਂ ਖੁਸ਼ਬੂ ਕਿਉਂ ਨਾ ਵੰਡਣ,

ਗੀਤ ਕਰੇ ਮੈਂ ਦਰਜ ਬੜੇ ਨੇ| 

ਕੰਢੇ  ਆਪਣੇ ਤੋੜਨਗੇ ਹੁਣ,

ਨੀਰ ਗਏ ਜੋ ਲਰਜ਼ ਬੜੇ ਨੇ| 

ਸਮਝਦਾਰ ਸ਼ਹਿਰੀ

ਸਮਝਦਾਰ ਸ਼ਹਿਰੀ

ਚੰਗੀ ਤਰ੍ਹਾਂ ਸਮਝਦੇ ਹਨ

ਕਿ ਸਭ ਤੋਂ ਵੱਡੀ ਸਮਝਦਾਰੀ

ਕਦੇ ਵੀ
ਕੋਈ ਵੀ

ਅਜਿਹੀ ਗੱਲ ਨਾ ਕਰਨ 'ਚ ਹੈ
ਜਿਸ 'ਚ ਸਮਝਦਾਰੀ ਹੋਵੇ....