ਕਈ ਵਾਰ
ਸਹੀ ਦਿਸ਼ਾ ਦੀ ਪਹਿਚਾਣ ਲਈ 
ਸਹੀ ਦਿਸ਼ਾ ਬਣਾਈ ਰੱਖਣ ਲਈ
ਤੁਸੀਂ ਸਿਰਫ਼ ਮਹਿਸੂਸ ਕਰਨਾ ਹੁੰਦਾ ਹੈ 
ਤੇਜ਼ ਹਨੇਰੀ ਦੇ ਥਪੇੜਿਆਂ ਨੂੰ 
ਆਪਣੇ ਚਿਹਰੇ ਉੱਤੇ 
ਅਤੇ 
ਰੇਤੇ ਦੀ ਕਿਰਕ 
ਸੁੱਕੇ ਬੁੱਲ੍ਹਾਂ ਉੱਤੇ...

ਤਜ਼ਰਬਾ

ਜਦੋਂ ਉਹ ਕਹਿੰਦੇ ਹਨ
ਕਿ ਜਾਗਣ ਦਾ ਸਮਾਂ ਆ ਗਿਆ ਹੈ
ਮੈਂ ਚੁੱਪਚਾਪ ਅੱਖਾਂ ਬੰਦ ਕਰਕੇ 
ਸੁਫ਼ਨੇ ਦੇਖਦਾ ਹਾਂ 
ਜਦੋਂ ਉਹ ਕਹਿੰਦੇ ਹਨ
ਕਿ ਬੇਫਿਕਰੀ ਦੇ ਦਿਨ ਆ ਗਏ ਹਨ 
ਕਿ ਚੰਗੇ ਸੁਫ਼ਨੇ ਦੇਖੋ 
ਮੈਂ ਫਟਾਕ ਅੱਖਾਂ ਖੋਲਦਾਂ ਹਾਂ 
ਉਹਨਾਂ ਦੀਆਂ ਅੱਖਾਂ ਵਿੱਚ ਦੇਖਦਾ ਹਾਂ....